තව්හිද් ජමාත් ත‍්‍රස්ත සංවිධානයේ නායකයාව සිටි මොහොමඞ් සහරාන් ඇතුළු එම සංවිධානයේ ජ්‍යෙෂ්ඨයන් පිරිසක් ඉදිරියේ තමා ඇතුළු මුස්ලිම් කාන්තාවන් 15 දෙනා මරාගෙන මැරෙන ප‍්‍රහාර සඳහා දිවුරුම් දුන් බව ද එම තරුණිය වැඩිදුරටත් ප‍්‍රකාශ කර ඇත.
මෙසේ දිවුරුම් ලබාදුන් මුස්ලිම් කාන්තාවන් අතරින් 05 දෙනකු අම්පාර සහින්දමර්දු ප‍්‍රදේශයේදී සහරාන්ගේ සොහොයුරා වූ මොහොමඞ් රිල්වාන් සමඟ බෝම්බ පුපුරවා ගෙන සියදිවි හානි කර ගත් බව ද එම තරුණිය ප‍්‍රකාශ කර තිබේ.
මේ අතර මරාගෙන මැරෙන ප‍්‍රහාර සඳහා දිවුරුම් දුන් කාන්තාවන් අතුරින් තිදෙනකු බන්ධනාගාරගතව සිටින අතර, ඉතිරි කාන්තාවන් 07 දෙනා ත‍්‍රස්ත විමර්ශන ඒකකයේ රැුඳවුම් නියෝග මත තබාගෙන ප‍්‍රශ්න කරගෙන යන බව පොලිස් මාධ්‍ය ප‍්‍රකාශක නීතිඥ අජිත් රෝහණ මහතා පවසයි.
ත‍්‍රස්ත විමර්ශන කොට්ඨාසයේ නිලධාරීන් විසින් ඊබ‍්‍රහිම් ෂාහීඞ් නමැති 24 හැවිරිදි තරුණිය ඉකුත් 19 වැනිදා අත්අඩංගුවට ගනු ලැබුවේ මාවනැල්ලේ පිහිටි ඇගේ නිවසේ සිටියදීය.
සැකකාර තරුණියගේ පියා වන ඊබ‍්‍රාහිම් මවුලවි සහ සොහොයුරන් දෙදෙනා වන මොහොමඞ් යුහයිම් ෂාහිඞ් අබ්දුල් හක් සහ මොහොමඞ් යුහයිම් ෂාදික් අබ්දුල් හක් මේ වන විට බන්ධනාගාර ගත කර සිටින අතර ඔවුහු මාවනැල්ල ප‍්‍රදේශයේ බුදුපිළිම විනාශ කිරීමේ සිද්ධියේ ප‍්‍රධාන සැකකරුවන් ලෙස චෝදනා ලැබ සිටිති.
2019 වර්ෂයේ අපේ‍්‍රල් 21 වැනිදා ත‍්‍රස්ත ප‍්‍රහාරය එල්ල වීමෙන් පසු ඊබ‍්‍රහිම් ෂහීඞ් නමැති මෙම තරුණිය ත‍්‍රස්ත විමර්ශන ඒකකය මගින් අත්අඩංගුවට ගත් අතර ප‍්‍රශ්න කිරීම්වලින් පසුව ඇය මුදාහැර තිබිණි.
තව්හිද් ජමාත් සංවිධානයේ නායක මොහොමඞ් සහරාන්ගේ දේශනවලට සහභාගි වී ත‍්‍රස්ත ක‍්‍රියාකාරකම් සහ අන්තවාදී ප‍්‍රහාර සඳහා ආධාර අනුබල දීම සම්බන්ධයෙන් මෙම තරුණිය අත්අඩංගුවට ගෙන ඇත. මරාගෙන මැරෙන ප‍්‍රහාර සඳහා දිවුරුම් ලබාදීම පිළිබඳව තොරතුරු අනාවරණය වන්නේ නැවත අත්අඩංගුවට ගෙන සිදුකළ ප‍්‍රශ්න කිරීම්වලදී බව මාධ්‍ය ප‍්‍රකාශක නියෝජ්‍ය පොලිස්පති අජිත් රෝහණ මහතා පවසයි.
-හේමන්ත රන්දුණු
